Белгечләр коронавирус инфекциясе йоктыручыларның кайчан кимиячәген әйтте

Июль урталарында коронавирус инфекциясе йоктыручылар саны кими башларга, көз урталарында исә яңадан артырга мөмкин. ДНКОМ молекуляр-генетик тикшеренүләр фәнни үзәге генераль директоры Андрей Исаев шундый фаразын җиткерде.

«Эпидемия дулкыны бер югары күтәрелә, бер кими, — диде Исаев. — Агымдагы дулкын июль урталарында чигенә башлар дип өметләнәм».

Исаев фаразлавынча, коронавирус инфекциясенең яңа очраклары июль аенда бер кимеп алганнан соң көз урталарында – сентябрь ахырында аларның саны янә арта башлаячак.

«Әгәр прививканың беренче компонентын алгансыз икән, сезнең иммунитет дүртенче дулкынга әзер булачак», — диде белгеч.

Исаев нәкъ менә көзен вакцинациянең нәтиҗәсе сизеләчәген искәртте.

Чыганак: Ватаным Татарстан