БЕРЕНЧЕ ТАТАР АКТРИСАСЫ ТУРЫНДА СПЕКТАКЛЬ ЧЫКТЫ

Кариев театры актрисасы Халидә Сөнгатуллина тамашачы алдына беренче татар актрисасы Сәхибҗамал Гыйззәтуллина-Волжская образында чыкты. «Яратып туялмадым» мелодрамасының премьерасы актрисаның юбилеена багышланган иде.

Айгөл Әхмәтгалиеваның «Яратып туялмадым» пьесасы буенча спектакльне Кариев театрының баш режиссёры Ренат Әюпов куйды. Рәссам — Булат Гыйлванов. Композитор — Зөлфәт Вәлиуллин.

Спектакльдән соң Татарстанның халык артисты Халидә Сөнгатуллинаны Татарстан мәдәният министры урынбасары Дамир Натфуллин, Казан шәһәре мәдәният идарәсе җитәкчесе Азат Абзалов, Казан театрлары артистлары котлады.

«Мин беренче тапкыр театрга аяк баскач, театр җитәкчесе Фәрит Хәбибуллин: „Гыйззәтуллина килде“, диде. Мин борылып карадым, артымда берәү дә юк иде», — диде Халидә Сөнгатуллина тамашачысына рәхмәт сүзләрен әйткәндә.

«Яратып туялмадым» мелодрамасының беренче татар актрисасы Сәхибҗамал Гыйззәтуллина-Волжскаяның Чистай интернатындагы соңгы көннәренә багышланган.

tatar-inform.tatar