Бүген - Халыкара балалар китабы көне

Бүген дөньяда Халыкара балалар китабы көне билгеләп үтелә. Бәйрәм уңаеннан Казанда балалар һәм өлкәннәр өчен кайбер чаралар уздырыла.

Мәсәлән, Республика балалар китапханәсендә “Г.Х. Андерсенның әкият дөньясы” дигән презентация-күргәзмә-очрашу әзерләнгән иде.

Габдулла Тукай исемендәге әдәби музейда Татарстанның балалар язучылары белән очрашу, “Тукай дөньясына сәяхәт” интерактив лекциясе булды. Шулай ук бүген 16.00 сәгатьтә робот-экскурсовод катнашында «Тукайны бергәләп өйрәник» исемле экскурсия була. 

Бәйрәм көнендә Муса Җәлил мемориаль музеенда Йолдыз Шәрәпова белән очрашу була. Танылган шагыйрә, күп кенә балалар  китабы авторы белән очрашу «Сезгә әйтер сүзем бар…» дип атала.
Казан Кремленең «Манеж» күргәзмәләр залында ТР Язучылар берлеге әгъзасы, балалар язучысы Вера Хәмидуллина интерактив дәрес үткәрә. Сент-Экзюпериның Нәни Принцы әйтмешли, без барыбыз да балачактан килдек, шуңа күрә балалар китабы өлкәннәр өчен дә әһәмиятле. Чөнки китапка мәхәббәт балачактан ук тәрбияләнә. Сабыйларыгызны җитәкләп, Халыкара балалар китабы көне уңаеннан үткәрелгән чараларга барырга онытмагыз, дуслар!

Фото: kazanutlary.ru