Бүген - Халыкара театр көне!

27 март - Халыкара театр көне буларак бәйрәм ителә. Әлеге уңайдан Татарстан мәдәният министры Ирада Әюпова республика халкын әлеге бәйрәм белән котлады.

“Татарстан – Россиянең зур театр үзәкләренең берсе, ул уникаль театраль мәдәнияткә ия. Бүгенге көндә республикада төрле жанрлы һәм юнәлешле дистәләгән театр эшли. Профессиональ коллективлар гына түгел, һәвәскәр коллективлар да үз иҗатлары белән сөендереп тора. Моннан тыш хосусый театрлар да, иҗат лабораторияләре дә уңышлы эшли, эксперименталь проектлар гамәлгә ашырыла”, - дилә котлауда. 

Карантин булуына карамастан, татар театрлары үз эшләрен дәвам итәләр: репетицияләрдән онлайн-трансляция, архивтан спектакльләрнең видеоязмаларын, туры эфирда артистлар белән әңгәмәләрен урнаштырып баралар. Без дә сезгә, театр көне уңаеннан, кайбер видеоязмаларны карарга тәкъдим итәбез. 

1. К.Тинчурин исемендәге татар дәүләт драма һәм комедия театры кичә "Сүнгән йолдызлар" спектакленә әзерләнү мизгелен урнаштырды

2. Г.Кариев исемендәге татар дәүләт яшь тамашачылар театры артистларының карантин вакытында файдалы киңәшләре белән бүлеште. 

3. Г.Камал исемендәге татар дәүләт Академия театры архивта сакланган иң яхшы спектакльләр видеоязмасын карарга киңәш итте. 

4. Әлмәт дәүләт татар драма театрында зур реконструкция башлана. Шуңа да карамастан, театр тамашачыларның инстаграм сәхифәсендә туры эфирга чакыра

5. Г.Тукай исемендәге Әтнә дәүләт драма театры рәсми сайтында "Мулла" спектакленең видеоязмасын урнаштырды. 

6. "Әкият" татар дәүләт курчак театры сайтында архивтагы видеоязмалар куелды. 

Фото: пиксабай, "Татар-информ"