Булат Бәйрәмовның кызы Кырымдагы агуланган балалар арасында булган

Кырымның Евпатория шәһәре янындагы Заозёрное бистәсендә урнашкан “Лучистый” лагерында  ял итүче Татарстан балаларының агулануы хакында узган атнада билгеле булды. Барлыгы 54 кеше, балалардан тыш әйдаманнар да зыян күргән. Аларны норовирус аяктан еккан булып чыкты. Вирус исә ашханә эшчеләреннән күчкән. Сабыйлар, Кырымда дәваланганнан соң, ялларда чартер рейс белән Казанга кайтарылдылар. Алар арасында “йолдызлы” гаилә Булат Бәйрәмов белән Ләйсән Гыймаеваларның кызлары Зифа да булган. Бу турыда Ләйсән социаль челтәрдәге үз сәхифәсендә язган: “15 июльдә дәваханәгә эләккән балаларның хәле 2-3 көннән соң яхшырды, ләкин... аларны хәзер дәваханәдән чыгармыйлар. Балаларның җәйге ялларын дәвам итәр өчен кире лагерьга кайтасылары килә. Бүген тагын бер яңалык килеп иреште, аларны “Лучистый” лагере җитәкчелеге яңадан лагерьга кабул итмәячәк, янәсе, бу балалар, сәламәт балаларга куркыныч тудыра! Шул уңайдан, 21 июльдә махсус рейс белән балаларны Казанга кайтару турында карар кабул ителгән. Без, ата-аналар уйлавынча, балаларны лагерьга кертмәү алдан ук билгеле булган. Сораулар туа, ни өчен алайса Казанга кайтуны алданрак оештырмаганнар? Ә хәзер, балалар терелгәч, нигә лагерьга кабул итмиләр? Алар көн дә елап әти-әниләренә шалтырата, “без терелдек”, “без сәламәт”, “яңадан лагерьга барасыбыз килә” диләр... Министр хәтле министр балалар янына барып, бу хәлгә ачыклык кертә алмагач, кемнән ярдәм көтәргә? Ә безнең балаларның ел буе көтеп алган ялларын дәвам итәсе, диңгездә коенасылары килә...”. 

Фото: Булат Бәйрамов инстаграмыннан