«Әдәби кафе»да язучы Нәбирә Гыйматдинова яңа чыккан «Уйламаган көнем юк» китабына автографлар куячак

«Уйламаган көнем юк» китабы «Казан утлары» китапханәсе сериясендә чыккан беренче китап. Ул «Татмедиа» акционерлык җәмгыятенең «Идел-пресс» полиграфия комплексында 2000 тираж белән басылып чыкты. Форматы — кесәгә сыя торган йомшак тышлы китап.

17 декабрьдә 15 сәгатьтә Казанда Татмедиа бинасындагы (Декабристлар урамы, 2 йорт) «Әдәби кафе»да язучы Нәбирә Гыйматдинова яңа чыккан «Уйламаган көнем юк» китабына автографлар куячак. Автограф-сессияне «Казан утлары» журналы оештыра.

Нәбирә Гыйматдинова әсәрендәге төп образлар турында сөйләде. «Мәсәлән, Тәслимә — талантлы язучы, фәлсәфи әсәрләр яза һәм шуның өчен ул журналдан редактор тарафыннан куыла. Ни өчен дигәндә, журналга җиңел укыла торган әйберләр кирәк. Аның ире Миндияр — комарлы уеннар белән мавыга, Лас-Вегаста казиноларда зур акчалар эшләргә хыяллана. Ләкин анда барып җитә алмый, Тәслимәнең хыялында төзегән бик матур зур йортын оттырып, хатынын бурычка батыра», — дип сюжетның серен ачты автор.