Дилә Нигъмәтуллина Марат Мухинның никахлашуы турында: миннән корбан ясамагыз!

Марат Мухинның соңгы посты татар инстаграмында иң күп гауга чыгарганнарның берсе булды. Композиторны Диләне бала белән калдырып китүдә гаепләүчеләр дә булды. Кичә Марат Мухинның язмасын куйган идек.

Бүген Дилә дә бу темага пост куйган.

«Әйе, без Марат белән күптән бергә түгел. Ләкин мин аеырылышу сәбәпләрен сөйләргә җыенмыйм. Без аның белән дустанә мөнәсәбәтләрне саклап кала алдык. Булат та Марат белән яхшы мөнәсәбәттә. Ул хәтта никахка да чакырулы иде. 

Марат бик яхшы әти, ул кызыбызны тәрбияләүгә зур өлеш кертә. Мин Марат өчен бик шат һәм аңа чын күңелдән гаилә бәхете телим.

Хөрмәтле дуслар, зинһар, миннән корбан ясамагыз. Мин бәхетсез кешегә охшаганмыни? Мин күптән кияүдә, ләкин шәхси тормышымны кешегә күрсәтергә теләмим. Минем моңа хакым бар», – дип язган җырчы.