ДМИТРИЙ ТУМАНОВ ПАСПОРТ ТАПШЫРА

Татарстан Милли музеенда 11 декабрь көнне 14.00 сәгатьтә «Мин-Россия гражданины! Мин-Татарстан баласы!» акциясе узачак.

Биредә Казанның 14 яше тулган яшь гражданнарына паспортлар тапшыру тантанасы булачак. Үсеп килүче буынга патриотик тәрбия бирүгә юнәлдерелгән акция укучыларны туган як тарихы белән таныштыра, балаларда актив гражданлык позициясе кыймәтләренә нигезләнгән узаң формалаштыра, Россия дәүләте символикасы – герб, флаг, гимнга карата ихтирамлы һәм сакчыл караш тәрбияли.

Яшь гражданнар илнең төп гражданины документын Татарстан Республикасының атказанган сәнгать эшлеклесе, Кырым Республикасы атказанган сәнгать эшлеклесе, Россия Федерациясе Хөкүмәтенең мәдәният өлкәсендә Премия лауреаты, «Халыкны саклау өчен» премия иясе Дмитрий Александр улы Туманов кулыннан алачак.

Д.А.Туманов белән аралашу, һичшиксез, яшь гражданнар өчен әһәмиятле чара, ул аларның гражданлык позициясен формалаштыруда һәм яшь буында патриотик хисләрне үстерүдә уңай чагылыш табачак. Барлык кунаклар, бигрәк тә яшүсмерләр өчен бу истәлекле вакыйга, Татарстан Республикасы һәм Россия Федерациясе гражданины тормышында мөһим тарихка әвереләчәк.