Фестиваль-конкурс - "Без үзгә, әмма без бергә"

"Татарстан — яңа гасыр" республика иҗтимагый хәрәкәте тарафыннан ТАССРның 100 еллыгына багышланган "Без үзгә, әмма без бергә" ("Мы разные, но мы вместе") дип исемләнгән фестиваль-конкурс уздырылачак.

Фестиваль ТАССР барлыкка килү тарихын һәм Татарстанның җыр мирасын өйрәнүгә, саклап калуга һәм танытуга ярдәм итү максатыннан уздырыла. "Татарстан Республикасы студентлар хорлары алдында төрле халыклар әсәрләрен башкару, республикабызда студентлар хор коллективларын активлаштыру, ТАССРның 100 еллыгына багышланган яңа концерт программалары булдыру күздә тотыла"- ди бу хакта Татар халык хоры җитәкчесе Ирнис Рәхимуллин.

Аның сүзләренчә, программада төп таләп — хор коллективының сайлавы буенча ике төрле жанрлы әсәр башкару. "Жюри аларның сәнгатьлелеген, бирелгән тематикага туры килүен бәялиячәк. Мәҗбүри әсәр: „Туган ягым — Татарстан“ җырын башкару (Александр Ключарев музыкасы, Гөлшат Зәйнашева сүзләре)".

Микрофоннар һәм фонограммалардан файдалану рөхсәт ителми. Беренче сайлап алу туры февраль–мартта, икенче тур март–апрельдә һәм өченче тур гала-концерт форматында майда узачак

"Бәйге ТР студентлары арасында хор мәдәниятен пропагандалау юлы белән ТАССР төзелү тарихын һәм Татарстанның җыр мирасын өйрәнү, саклау һәм популярлаштыру максатында уздырыла", - ди Ирнис Рәхимуллин.

Гаризалар 14 февральгә кадәр кабул ителә.

Чыганак: tatar-inform.tatar