Фирдүс Тямаев зур проблема белән мөрәҗәгать иткән: "Ул наркоманиядән дә начаррак"

Җырчы Фирдүс Тямаев инстаграм битендә бер видео белән уртаклашты. Видеода ул бүгенге көндә бик зур тизлек белән үсеш алган азартлы уеннар темасын күтәрә.
«Күптән бу видеоны яздырасым килгән иде. Бер проблема белән чыгам. Ул проблема бөтен дөньяны басып алды. Бүген көндә яшьләр, өлкәннәр дә – 80 процент шушы проблема белән йөри. Ул игромания дип атала. Бүген иртән хәбәр килде, бер дустым үз-үзенә кул салган. Моңа кадәр ике дустым үз-үзенә кул салган иде. Әти-әниләр! Бүгеннән үк балаларыгызны тикшерегез, аларга артык ышанмагыз. Телефон ярдәмендә ставка куялар. Банк карточкасы аша кереп китәләр дә, шуның аркылы уйныйлар.
Ул наркоманиядән дә начаррак. Сизсәгез, балаларыгызга кычкырмагыз, сукмагыз, кул күтәрмәгез, бары тик җайлап, психологка алып барыгыз, мәчетләргә алып барыгыз. Ирләре уйнаган хатыннар, аерылышырга ашыкмагыз, чөнки ул уен кешене психик яктан зомбилаштыра. Якын кешегезгә бурычка акча бирмәгез...»

Азартлы уеннар уйнауга диннең карашы дә мәгълүм. Бу хәмер эчү кебек үк зур гөнаһ санала. Моның турында Коръәннең "Әл-Бәкара" сүрәсендә дә язылган. 

Үзегезне һәм якыннарыгызны саклагыз!