Гүзәл Уразовадан мантый рецепты

Социаль челтәрдә күптән саклап куйган рецептым бар иде. Ул да булса, җырчы Гүзәл Уразовадан мантый рецепты. Әлеге рецептны монда да язырга булдым. Яхшы әйбер белән уртаклашсаң, бәрәкәте күбрәк була диләр! 

Камыр: 1 йомырка, 3 аш чүмече су, тоз.

Эчлек: 1 кг бәрәңге, 500 грамм фарш, 2 суган, тоз, борыч.

Йомырканы су белән болгатып, әз генә тоз салгач, он өстәп камыр басабыз (минем мантый кәстрүле өчен бу 40 мантыйлык камыр). Бәрәңгене вак-вак итеп шакмаклап турыйбыз. Иттарткычтан чыгарылган ит, ваклап туралган суган кушабыз. Тәменчә тоз, борыч өстибез. Фарш бик майлы да, бик коры да булмасын инде. Ит белән бәрәңге 40/60, яки 50/50 чамасы булырга тиеш. Алайса, Казанда мантыйны бүтәнчә, ит һәм суган белән генә пешерәләр. Ә без бәрәңге белән иттән пешергәнне яратабыз. Камырны 40 кечкенә кисәккә бүләбез дә, һәр кисәкне түгәрәк формасында аерым җәябез. Аннары шул җәймәгә әзер эчлекне салып, матур итеп ябыштырып чыгабыз. 40-45 минуттан (1 сәгать тә ярый) мантый әзер.

Әлеге рецептны сез дә үзегезгә репост ясап саклагыз! 

Фото: ирекле чыганак