Идел дә абый булды!

Шагыйрь Рүзәл Мөхәммәтшин белән аның хәләл җефете Миләүшә гаиләсендә бу көннәрдә зур шатлык: аларның икенче баласы туды! Кыз! 3390 грамм!
Сабый белән әнисе әлегә бала табу йортында, чыгар көннәре җиткәнне көтеп яталар.

Мөхәммәтшиннар гаиләсендә инде Идел исемле егет үсә, аңа 6 яшь. “Идел” редакциясе бу егетне бик үз итә, чөнки ул “Идел”дә туды, дияргә мөмкин – әтисе журналда бүлек мөхәррире булып эшли иде ул чакта.
Мөхәммәтшиннар төпчекләренә Ләлә дигән исем кушарга ниятли. Бу исем мәшһүр журнал һәм халык җырларына кергән борынгы елга белән адаш булмаса да, татар халкының милли символы – лалә (тюльпан) чәчәгенә аваздаш булуына игътибар иттек.
Мөхәммәтшиннарны барлык редакциябез белән ихлас күңелдән котлыйбыз. Сабыйга һәм әнисенә саулык телибез. Бәхетле, тәүфыйклы булып үссен сабый!