Изге Болгар көрәшчеләрне чакыра!

15 июньдә - тарихи Болгар җирлегендә 15нче тапкыр "Изге Болгар җыены" узачак. Быел анда беренче тапкыр Сабантуй да оештырыла.

Бу хакта безгә Татарстан көрәш федерациясе башкарма директоры Равил Хәйруллин хәбәр итте. Аның сүзләренә караганда, "Изге Болгар җыены"ндагы Сабантуйда көрәш ярышлары өч үлчәү авырлыгында үтәчәк: 70 кг.га кадәр, 90 кг.га кадәр һәм 90 кг.нан авыррак булган категорияләр. Шәп кенә приз фонды да каралган, диде ул безгә.

Болгар Сабан туена теләгән һәр көрәшче чакырыла. Бәйге 18 яшьтән өлкән булган көрәшчеләр арасында узачак.

Көрәшчеләр, бәйгедә катнашу өчен иртәнге тугызга кадәр теркәлергә кирәк!