Камал театры билетлар сата. Сез әйткән бәягә

Г.Камал исемендәге Татар дәүләт академия театры үзенең онлайн-спектакльләренә билетлар сата башлады. Куелышлар рус субтитрлары белән барачак. Театрның матбугат хезмәте хәбәр итүенчә, спектакльләрнең видеоларын компьютер, смартфон һәм Smart TV ярдәмендә карап була.
Билетларга төгәл бәя куелмаган. Шуңа күрә тамашачы аны үзе теләгән суммага карый алачак. Ләкин спектакльне билгеле бер вакытта һәм аннан соң 48 сәгать дәвамында гына карап булачак.
«Сез үзегез дөрес дип санаган бәяне куясыз. Теләсә нинди сумманы. Без сезгә нинди генә бәя куйсагыз да рәхмәтле булабыз. Тамашачыларсыз театр  - театр түгел инде», - дип аңлата моны театр хезмәткәрләре.
8 апрельдә «Мәхәббәт FM», 9ы көнне «Мәңгелек буран», 10 апрельдә «Җәйнең бер көнендә», 11е «Сөясеңме, сөймисеңме…» һәм 15 апрельдә «Бию пәрие» спектакльләрен онлайн карап булачак.
Моңа кадәр без репертуардан төшкән спектакльләр турында язган идек.