"Кара җомга"да Казанлылар кибетләрне "бет" кебек талады

Бу көннәрдә бөтен дөньяның зур кибетләрендә "Кара җомга" акциясе узды. "Черная пятница" – көнбатыштан кергән акция, ул гадәттә зур сәүдә үзәкләрендә уздырыла. Акциядә катнашучы кибетләр сатып алучыларны зур ташламалар белән кызыктыра. Әмма бездә, асылда, башта бәяләр күтәрелә, аннан күтәрелгән бәяне сызып, элеккеге бәя куела. Нәтиҗәдә, ташлама ясамау гына түгел, бәяләр артырга да бик мөмкин. Күз буяу өчен кайбер товарларны чыннан да арзанрак бәягә сатарга мөмкиннәр, ләкин андый әйбернең сыйфаты да түбән дәрәҗәдә була шул. 
Бу ялларда Казанның сәүдә үзәкләрендә халык шыгрым иде, социаль челтәрләрдә, "ВКазани поймут" төркемендә,  “Тандем”га акциягә җыелган кешеләрне фотога төшереп элгәннәр. Социаль челтәрдәге хәбәргә караганда, фотодагы кешеләр чәйнек уйнатуга җыелган. 
«Тандемда кешеләрдән “бөке” хасил булган! Тәмуг белән бер. Ярты Казан чәйнек отарга килгән», — дип язган хәбәр авторы фото астына.
Кичә Казандагы МЕГА сәүдә үзәгенә баручы юлларда да халык берничә чакрымга сузылган "бөке" дә торды. Моның сәбәбе дә Казан халкының сәүдә үзәгенә агылуында иде.