Карелия һәм Татарстан лидерлары очрашуы кайтавазы: Казанда Карелия киносы көннәре

Мәгълүм булганча, 14 майда Казан кирмәнендә Татарстан Республикасы Президенты Рөстәм Миңнеханов һәм Карелия Республикасы башлыгы Артур Парфенчиков очрашты. Ике республика арасында 2014 елның 17 июленнән бирле сәүдә-икътисадый, фәнни-техник, социаль һәм мәдәни хезмәттәшлек турындагы килешү гамәлдә булды, шулай ук быел февральдә «Сочи-2019» Россия инвестиция форумында Татарстан һәм Карелия Республикасы Хөкүмәте арасында 2019-2021 елларга сәүдә-икътисадый, фәнни-техник, социаль һәм мәдәни хезмәттәшлек турындагы Килешүне гамәлгә ашыру чаралары планы имзаланган иде.

Бу юлы Казанда узган очрашуның максатларын тәгаенләп, Татарстан Президенты Рөстәм Миңнеханов: «Төбәкләр бер-берсен тулыландырырга тиеш. Без юл картасында планнарыбызны җентекләп яздык, әмма аларны тагын да тәгаенләргә телибез», – диде.

Төбәкләрнең үзара тауар әйләнешен арттыру, тәҗрибә алмашу турындагы күпсанлы планнар арасында мәдәни багланышлар аерым урын алып тора. Моңа мисал буларак, май аенда ук Казанда Карелия киносы көннәрен үткәрү каралган.

Карелия кинематографистлары  23- 25 май көннәрендә респубикада төшерелгән 4 нәфис һәм 3 документаль фильм тәкъдим итәчәк. 

Нәфис фильмнар программасы: 
1.«Ананас» драмасы (реж. Владимир Рудак, 2016 ел, 98 минут, 12+). 
2. «Банкадагы кеше» комедиясе (реж. Иван Кульнев, 2012 ел, 62 минут, 16+).
3. «Соңгы романтик» комедиясе ( реж. Иван Кульнев, 2017 ел, 62 минут, 12+). 
4. «Акча» криминаль драмасы  (реж. Александр Хаакан, 2018 ел, 28 минут, 18+) 
Документаль фильмнар программасы:
1. «Кара Ламбыдан романтик» (33 минут, реж. Юлия Потахина, 12+). 
2. «Егоровна» (20 минут, реж. Татьяна Лунгина, 12+, карел телендә урысча субтитрлар белән). 
3. «Кошлар җыры» (17 минут, реж. Юлия Потахина, 12+).

Әйтергә кирәк, әлеге фильмнар инде зур экраннарда күрсәтелеп, Карелия тамашачысының уңай бәясен алган.

Татарстанда Карелия киносы көннәре” “Татаркино” берләшмәсенең “Мир” кинотеатрында үткәрелә.