Кариев исемендәге театр Башкортстан тамашачысы алдында имтихан тотачак

“Башкортстан, көт, без киләбез!” дип вәгъдә итә кариевлылар театрның рәсми сайтында һәм “берьюлы 5 иң әйбәт спектаклен” алып килергә ышандыра.

Театр Уфада – М.Кәрим исемендәге Милли яшьләр театрында, Туймазыда – Туймазы дәүләт татар драма театрында һәм Шаран район Мәдәният йортында 21-25 апрель көннәрендә чыгыш ясаячак. Тамашачыга ”Ләйлә вә Мәҗнүн”, “Кәҗүл читек”, “Без шундый театр төзербез” театраль тамашасы, “Куян Эдвардның гаҗәеп сәяхәте” һәм баш режиссёр Ренат Әюпов юбилеена багышланган “Шәй-бү! Шай-бу!” спектакле тәкъдим ителәчәк. Нибары биш көн эчендә өч шәһәрдә (!) өлкәннәр өчен дә, балалар өчен дә төрледән-төрле спектакль күрсәтү – уен эш түгел, һәр сәхнәдә һәркөн саен – икешәр-өчәр чыгыш дигән сүз бу. Ләкин кариевлыларның сынатырга һич исәбе юк.

Шунысын да искәртик: театр директоры Гүзәл Рәмзил кызы Сәгыйтова – тумышы белән Башкортстан республикасының Шаран районы Түбән Заит авылы кызы. Шунысын да искәртик, “Кәҗүл читек”, “Шәй-бү! Шай-бу!” һәм “Без шундый театр төзербез” тамашасы – Гүзәл Сәгыйтова директор итеп билгеләнгәннән соң куелган премьералар. Димәк, яңа директор өчен бу гастроль – якташлары алдында үзенчәлекле имтихан да булачак әле.