Карлыганнан җиңел морс рецепты

Карлыган өлгергән чак. Быел уңыш шактый күп күренә. Өлгергән чагында ашап калу хәерле. Ашап бетермәгәнен катырып яки кайнатма ясап куярга була. Ә менә эссе көннәрдә бик тәмле һәм җиңел эшләнелә торган морс ясап эчәргә була.

Карлыганны җыеп юарга, яфрак ботакларыннан араларга кирәк. Аннан чиста карлыганга бераз су өстәп блендер белән яхшылап изәбез. Вак иләк аша яки марля аша сөзеп утка куябыз. Ара-тирә болгаткалап алабыз, берничә аш-кашыгы шикәр комы яки бал өстибез (тәменә карап. кемдер әчкелтемрәк булганны ярата). Яхшылап кайный башлаганчы уттан алабыз. Әлеге рецепт кызыл карлыган өчен дә кара карлыган өчен дә менә дигән.