"Карурман" - Тинчурин театры сәхнәсендә

2 декабрь Г.Кариев исемендәге яшь тамашачылар театрында "Карурман" спектакле эскизын караган идек. Әлеге эскиз хәзер спектакль буларак "өлгергән" һәм ул Тинчурин театры сәхнәсендә куелачак. Бу хакта театрның матбугат хезмәте хәбәр итә.

Кем син?
Кем мин?
Кемнәр алар?
Ике дөнья чигендә калсаң, нишләргә? Үзең һәм якыннарың, дәүләтең өчен җаваплылыкны менә хәзер, шушында кулыңа алырга туры килсә, син моңа әзерме? Асылыңнан, тамырларыңнан баш тартып, «яңа дөнья» төзи аласыңмы?
Әллә үз чытырманнарың эченә генә кереп адашасыңмы? Ул урман эчендә – котылумы, үлемме?
«Карурман» пьесасы без балачактан белгән каһарманнар һәм мифларны яңача «укырга», заманча лиро-эпика һәм фэнтези өслүбендәге вакыйгаларга башка күзлектән карарга чакыра.
Бу – язылмаган дастан.
Шуның белән ул серле дә.
Куркыныч та.
Без кайчандыр бер-беребезне саклар, яклар өчен яратылган идек. Алар – безне, без – аларны. Дөнья тигез, имин иде ул чакта. Аннан, көчне бер-беребезгә каршы куллана башладык та, бар нәрсәнең асты-өскә килде.
Син сайлый аласың.
Син хәзер ике дөнья чигендә торасың».
Кем син?
Кем мин?
Кем БЕЗ?

"Карурман" (Режиссеры - Резеда Гарипова) - фэнтези жанрында иҗат ителгән. Пьесаның авторлары - Луиза Янсуар һәм Резеда Гарипова. Проектта Тинчурин һәм Кариев театры артистлары, Казан театр училищесы студентлары, "Джуна" музыкаль төркеме һәм Зәринә Вилданова катнаша. Тинчурин театры директоры Фәнис Мөсәгыйтов әйтүенчә, әлеге спектакль күп чыгым сораган, бигрәк тә костюмнар өчен зур сумма киткән. Шулай итеп, тамашачылар спектакльне сәхнәдә күрә алачак.

Премьера 12,13 март көннәрендә көтелә.