Казан-Чаллы юлында – фаҗига

Яллар көне Питрәч районы Званка авылы янында, олы юлда агулы матдә агып, юл хәрәкәтсез калды. Юлдагы бөке 5 км сузылган иде. Машиналарга куркыныч урынны урап узарга туры килде. 

Тригонокс дигән агулы матдәнең Бельгиядән Стәрлетамакка бара торган автоцистернадан агуы ачыкланган. Әлеге  йөк автомобиленең суыту җайланмасы ватылган булып чыкты. 
Тригонокс – төссез сыеклык. Ул каты ышкылудан һәм бәрелүдән шартларга мөмкин. Тән тиресенә эләксә, дерматит хасил итә. Организмга тагын да эчкәрәк үтеп керсә, үзәк нерв системасы эшчәнлеген боза. Моннан тыш, тригонокс янгын, шартлау куркынычы тудыручы катнашма булып та санала әле. Шуларны истә тотып, агулы матдә аккан урынга ком һәм күбек сипкәннәр. Ә инде ул парга әйләнеп беткәч, машина хәрәкәте җайга салынган. Бәхеткә берәү дә зыян күрмәгән.