Казан Кирмәне хәтта Мәскәү Кремлен дә уздырган!

2018 елда Русия музейлары һәм күргәзмә проектлары арасында иң популярларының исемлеге басылды. Аны, Русия Мәдәният министрлыгы статистикасына таянып, дөньякүләм билгеле The Art Newspaper Russia басмасы игълан итте.

Әлеге исемлектә Татарстанның өч музей комплексы рейтинг таблицасының өске юлларында күренә:

“Төбәкләрдәге тарихи-туган якны өйрәнү музейлары арасында халык иң күп йөри торганнары. Топ-10” номинациясендә ТР Милли музее беренче урында: 2018 елда аны, рейтингтан күренгәнчә, 652200 кеше караган!

“Казан Кирмәне тарихи-мәдәни тыюлыгы” комплексы исә федераль күләмдәге “Халык иң күп йөри торган парк комплекслары, ландшафт һәм тарихи-архитектура музейлары, кремльләр. Топ-25” номинациясенең дүртенче юлында. Әлеге номинация буенча рейтинг 2017 елда да төзелгән булган - Казан Кирмәне үзенең элекке позициясен саклап кала алган, ләкин тамашачылар санын шактый үстерә алган: 2774100 (2017) һәм 2928600 (2018) кеше. Беренче бишлеккә кергән Казан Кирмәне турында рейтинг төзүчеләр: “Казан Русиянең өченче мәдәни башкаласы исеменә дәгъва кыла” дип саный. Сәбәбе билгеле: рейтингның беренче-өченче юлларын “Петергоф”, “Царское село”, “Исаакиевский собор” (Санкт-Петербург) комплекслары били. Тамашачылар саны буенча Казан Кирмәне исә хәтта Мәскәү Кремлен дә уздырган (2868600 кеше)!

Шушы ук номинациядә топ-25 тә Татарстанның тагын бер музей комплексын күрәбез: Алабуга дәүләт тарихи-архитектура һәм сәнгать музей-тыюлыгын 2018 елда 774600 кеше караган. Ул рейтингның 14 юлында.

Рейтинглар белән тулырак итеп монда танышырга була.