Чәйни торган тәмәке эпидемиясе

Бүген 21 ноябрь халыкара тәмәке тартудан баш тарту көне. Күпләр Рәсәйдә үсмерләр һәм мәктәп укучылары арасында булган эпедемия турында белми дә. Татарстан мәктәпләрендә ата-аналар һәм укытучылар чәйни торган тәмәкегә каршы көрәшә. Аны снюс дип атыйлар, һәм бүгенге көндә аны легаль рәвештә  мәктәп баласы да сатып ала ала. Наркотикның контрольсез сатылуы Казан Кремлен дә борчый. Казан Кремленең рәсми вәкиле Лилия Галимова ТР Хөкүмәте йортында узган брифингта шул хакта хәбәр итте.

Снюс тәмәкедән ясалган дип исәпләнсә дә, аның составында тәмәке юк. Снюс – синтетик никотин сеңдерелгән пластиналар. Әмма тәмәкегә караганда снюсларда ул 10 тапкырга  күбрәк.

«Кызганыч ки, чәйни торган тәмәке тыелган матдәләр исемлегенә кертелмәгән. Ул ирекле рәвештә сатыла, снюсны саткан һәм тараткан өчен җәза бирү каралмаган», - диде Галимова.

«Спайсларга бәйле тарихны хәтерлисезме? Башта ул ирекле рәвештә сатыла иде, соңыннан закон чыгаручылар аны тыелган препаратлар исемлегенә кертте», - дип искәртте Казан Кремленең рәсми вәкиле.

Препаратны тыелган матдәләр исемлегенә керткәндә, аның составы күрсәтелә. Әмма составын үзгәрткән очракта, аны тагын ирекле рәвештә сатарга мөмкиннәр, җитештерүчеләр кайчагында моннан файдалана да, дип өстәде Галимова.

Чыганак: tatar-inform