Казан мәктәпләрендә фандоматлар барлыкка килде

Русиядә эчемлекләр савытын кабул итүче фандоматлар барлыкка килде. Беренче сынау Казан шәһәрендә узды.

Пластик шешәләрне һәм алюминий банкаларны аерым җыю өчен автомат аппаратлар шәһәр мәктәпләрендә барлыкка килгән иде инде. Илебездә җитештерелгән беренче 20 фандомат ("РТ-Инвест") компаниясе Казан уку йортларына тапшырды.

Аппаратларда банка, шешәләрне ташлау өчен махсус тәрәзә бар. Электрон табло аның санын күрсәтәчәк, ә штрих-код буенча әйбернең пластик яки алюминий булуын билгеләячәк, шуннан соң гына шешәләр махсус секциягә җибәрелә. Бер фандомат 800 пластик шешә һәм 0,5 литр күләмендә 400 алюминий банка сыйдыра. Уртача алганда, укучылар аны 3-5 көн эчендә тутырырга тиеш булачак.

Шешә яки банкаларны фандоматка тапшырган һәр кеше кодлы чек ала. Аны www.tara-sbor.ru сайтында теркәп, тупланган балларны акция партнерлары товарларына һәм хезмәтләренә ташламаларга алыштырырга мөмкин булачак. 3 февральдән башлап уку елы ахырына кадәр шулай ук акциядә җиңүчеләр билгеләнәчәк. Шулай итеп, иң күп балл җыйган 10 катнашучы һәм 5 мәктәп призлар алачак. Моннан тыш, иң күп пластик һәм алюминий савытлар тапшырган катнашучылар да бүләкләнәчәк.
"Без партнерлар белән бу юлны 3-4 ел эчендә узарга тиеш, ә Көнбатыш Европа 10-15 ел эчендә үтте. Менә безнең план шул", - дип белдерде Илсур Метшин.

prokazan.ru