Казан шәһәренең яңа генераль планы проектыннан кызыклы фактлар һәм мөһим сылтамалар

Казан шәһәре муниципаль берәмлегенең бүген генә җәмәгатьчелек игътибарына тәкъдим ителгән генераль планы проектыннан 10  кызыклы факт:
1. Казан шәһәре муниципаль берәмлегенең  мәйданы 63839,55 гектар. Шуның 58929,85 гектарын генераль  план колачлаган.
2. Мәркәзебезнең генераль планы өч проектлау чорына исәпләп төзелгән: төзелешнең беренче чираты – 2025 елга кадәр; 20 еллык исәпләү срогы – 2035 елга кадәр; 40 еллык перспектива – 2055 елга кадәр.
3. Казан халкының саны (2018 елның 1 гыйнварына) – 1243,5 мең кеше. 
4. Халык тыгызлыгы –  2018 елда 1 гектарга 19,5 кеше булса, 2025 елга ул 21,5, ә 2035 елга 23,8 кеше булыр дип фаразлана.
5. Торак фондының гомуми мәйданы – 29,9 млн м2.
6. Магистраль урамнарның гомуми озынлыгы – 1796,3 км.
7. Метрополитен линияләренең озынлыгы – 18,3 км.
8. Трамвай юлларының озынлыгы – 59,7 км.
9. Казан шәһәре тәүлегенә 382 мең кубометр су куллана.
10. Казан шәһәренең генераль планы, текст мәгълүматыннан тыш, төрле таблицалар, схемалар, карталардан тора. Документның күләме – 596 бит!
Башкала төзелешенә кагылышлы төп документ проекты белән KZN.RU порталында – яңа гына дөнья күргән Казан муниципаль берәмлеге документлары җыентыгының 2019 ел 18нче июль санында танышырга була. Аның электрон версиясен https://www.kzn.ru/nayti-dokument/sbornik-dokumentov/387038/  сылтамасы буенча йөкләргә мөмкин. 
Фикер-тәкъдимнәр, сораулар калдыру ысуллары турында түбәндәге сылтама буенча шәһәр мэриясе сайтында тулырак мәгълүмәт урнаштырылган: https://www.kzn.ru/meriya/press-tsentr/novosti/v-stolitse-tatarstana-startuet-obsuzhdenie-proekta-generalnogo-plana-kazani/
Яки язма рәвештә  Казан шәһәренең Архитектура һәм шәһәр төзелеше идарәсенә түбәндәге адрес буенча мөрәҗәгать итәргә мөмкин: Груздев ур., 5, 102 каб. (9.00 сәгатьтән 17.00 сәгатькә кадәр). Шулай ук Казан шәһәренең Архитектура һәм шәһәр төзелеше идарәсендәге иҗтимагый фикер алышуларда каралырга тиешле проект экспозициясенә килүчеләрне исәпкә алу кенәгәсендә язма калдырырга мөмкин: Груздев ур., 5, 102 каб. (9.00 сәгатьтән 17.00 сәгатькә кадәр). Моның өчен ике очракта да паспорт кирәк.
Казанның Генераль планының эшләп бетерелгән проекты буенча иҗтимагый фикер алышулар 18нче июльдән 29нчы августка кадәр барачак. Казанлылар документ буенча үз искәрмәләрен, сорауларын һәм тәкъдимнәрен 29нчы июльдән 1нче августка кадәр калдыра ала, ә фикер алышуның төп мәйданчыгы – dispute.kzn.ru мәгълүмати системасы булачак. Шәһәр язмышына, димәк, үзебезнекенә дә, битараф булмыйк – генераль план белән танышырга вакыт табып, уй-фикерләребезне шәһәр җитәкчелегенә белдерик!