Казанда «ASYL» I Бөтенроссия драматургия конкурсы җиңүчеләренең пьесалары укылачак

Г.Кариев исемендәге Казан Татар дәүләт Яшь тамашачы театры 13февраль көнне Г. Кариев театрының кече залында балалар, яшүсмерләр һәм яшьләр аудиториясе өчен «ASYL» I Бөтенроссия драматургия конкурсы җиңүчеләренең пьесаларын уку оештырылачак, бу хакта «Идел» журналына театрның матбугат үзәге хәбәр итә. Анда актерлар белән бергә Казанның танылган медиа шәхесләре дә катнашачак.

Пьесалар исемлеге:
1. «Миңа дус кирәк» / «Мне нужен друг». Автор: Галимҗан Гыйльманов (Казан). Режиссер: Резеда Гарипова.
2.«Дикий джунгулс». Авторлар: Игорь Витренко (Рязань), Александр Тюжин (Ырынбур). Режиссер: Булат Минкин.
3.«Девочка с головой волка». Автор: Алексей Житковский (Нижневартовск). Режиссер: Эльдар Гатауллин.
4.«З.А.Б.Р.О.Ш.К.А.». Автор: Анна Донатова (Краснодар өлкәсе). Режиссерлар: Ангелина Мигранова һәм Родион Сабиров.
Белешмә өчен мәгълүмат: «ASYL» I Бөтенроссия драматургия конкурсы быел беренче тапкыр үткәрелде. Төп максаты: заман драматургларын барлау, театрлар репертуарын яңа пьесалар белән баету.
Конкурста рус, татар телләрендә язучы 174 автор катнашты. Алар элек бастырылмаган 217 пьеса тәкъдим итте. Катнашучыларның географиясе: Казан, Мәскәү, Санкт-Петербург, Пермь, Белгород, Махачкала, Рязань, Киров, Тольятти, Екатеринбург, Сочи, Калуга, Новосибирск, Донецк, Самара, Уфа, Белоруссия, Финляндия, Германия, Румыния.
Жюри төркемендә: Россиянең атказанган артисты, Татарстанның атказанган сәнгать эшлеклесе, Г. Кариев исемендәге Казан Яшь тамашачы театрының баш режиссеры Ренат Әюпов; әдәбият белгече, ТР Фәннәр академиясе Г. Ибраһимов исемендәге Тел, әдәбият һәм сәнгать институтының әдәбият белеме бүлеге мөдире Әлфәт Закирҗанов; театр тәнкыйтьчесе, Г.Камал исемендәге театрның әдәби бүлек мөдире Нияз Игъламов; театр тәнкыйтьчесе, журналист Оксана Кушляева (Санкт-Петербург); кино һәм театр драматургы Юлия Тупикина (Мәскәү); театр белгече, Казан дәүләт мәдәният һәм сәнгать институты укытучысы Гөлшат Фәттахова; әдәбият белгече, КФУ доценты Миләүшә Хәбетдинова. Лауреатларның пьесаларын театр сайтында укырга мөмкин, шулай ук алар җыентык буларак та дөнья күрәчәк, - ди проект авторлары. «ASYL» I Бөтенроссия драматургия конкурсы Татарстан Мәдәният министрлыгы һәм Россия Федерациясе Театр әһелләре берлеге ярдәме белән Г.Кариев исемендәге Казан Татар дәүләт яшь тамашачы театры тарафыннан үткәрелә.