Хәлил Шәйхетдиновтан мунча себеркесе әзерләү "рецепты"

Хәлил Шәйхетдиновтан мунча себеркесе әзерләү "рецепты" социаль челтәрләрдә зур популярлык казанды. Хәлил Хәмитович нәрсә турында сөйли соң?

"Идел" журналы хәбәрчесе белән сөйләшеп утырганда, Татарстан спорт министрының беренче урынбасары, Татарстанның атказанган спорт остасы Хәлил Шәйхетдинов мунча керергә яратуы һәм аның керүнең дә аерым тәртибе барлыгы хакында сөйләгән иде. "Мунчаны яратмаган татарны татарга санамыйм да мин. Үзенең бер тәртибе, техникасы бар аның. Иң мөһиме – ашап кермәскә. Мунчаны, себеркеләрне – имәннекен дә, каенныкын да – үзем әзерлим, төрле тәмле исләр кушам. Мунчага керәсең икән, анда инде ике сәгатьтән дә ким кермәскә, дип саныйм. Башта җылынам, себеркеләрне пешерәм, чабынам, аннан юынам әйбәтләп. Тән күзәнәкләре ачылгач, янә чабынам. Шуннан төренеп утырам да, тәмле чәйләр белән ял итәм. Ягъни мунча керү – ул үзе бер процедура. Кабатлап әйтәм, барысын да үзем әзерлим. Бер көнне абый пешергән иде себеркеләрне, үземнекенә җитми инде", дигән иде ул.

Шушы көннәрдә үзенең инстаграмдагы сәхифәсендә Хәлил Хәмитович мунча себеркесе әзерләүнең яңа ысулы турында сөйләп, видео урнаштырды. Әлеге ысулны ул Зөлфәт Зиннуровтан күргән икән һәм узган ел үзе дә кулланырга булган. Дусты белән җәй көне каен һәм имән себеркесе ясап, аларны целофан пакетка төргәннәр һәм суыткычка тыгып куйганнар. "Менә алдым да, җылы суга салдым. Мунчада исә февраль башында май исе чыкты... Ох", дип, шатлыгы белән уртаклаша ул.