“КӘЛАМ ШӘРИФ. МӘГЪНӘВИ ТӘРҖЕМӘ” БАСМАСЫНЫҢ АУДИОЯЗМАСЫ ЭЛЕКТРОН КОРЪӘН-КАЛӘМГӘ КЕРТЕЛДЕ

  Татарстан мөселманнары Диния нәзарәте әзерләгән “Кәлам Шәриф. Мәгънәви тәрҗемә” басмасының аудиоязмасы Төркиянең Coşkun Teknoloji Ve Yayincilik нәшрияты тарафыннан электрон Коръән-каләмгә кертелде, дип яза ТР Мөселманнарының Диния нәзарәте сайты.

Коръән-кәламгә тәрҗемәләрне кертү — Coşkun Teknoloji Ve Yayincilik нәшрияты белән Диния Нәзарәте арасында беренче генә тапкыр хезмәттәшлеге түгел. Алдагы елда Нәшрият Нәзарәтнең халыкара стандартлар буенча әзерләнгән Коръән басмасын Төркиядә 12 мең тираж белән бастыра. Файлларны мөфтият бушлай тапшырды.

Мөселманнар арасында шактый популярлык казанган әлеге гаджет каләм рәвешендә эшләнеп һәм махсус Коръән басмасы белән бер комплектта килеп, аятьләрне номер буенча танып ала һәм аның гарәпчә әйтелешен, шулай ук башка төрле телләргә тәрҗемәсен әйтеп бирә. Төркиядә чыгарылучы җайланма программасында хәзер Коръәннең татарчага тәрҗемәсе дә урнаштырылды. Аятьләрнең мәгънәви тәрҗемәсе танылган телевидение алып баручысы Илдар Кыямов тавышы белән әйтелә.

   Төрек кардәшләр якын киләчәктә Коръән-каләмгә Коръәннең Татарстан мөфтие Камил хәзрәт Сәмигуллин тарафыннан яздырылган аудиоверсиясен дә кертергә ниятли. Тиздән татарча һәм русча тәрҗемәләрнең аудиоязмаларын Диния Нәзарәте мобиль кушымталар рәвешендә дә чыгарачак, шул вакытта басмалар белән бөтен өммәтне бушлай тәэмин итәргә мөмкин булачак һәм теләгән һәркем алар белән таныша алачак.

dumrt.ru