Конкурста катнаш! Яшьләр колагына

Президент Владимир Путин инициативасы белән гамәлгә куелган автономияле коммерциясез “Россия – минем илем” оешмасы “Минем илем – минем Россиям” проектлар конкурсын уздыра. Россия шәһәрләре һәм авылларын социаль-икътисадый яктан үстерүгә юнәлтелгән әлеге яшьләр проектлары конкурсы бөтен ил буенча узачак.

Катнашыр өчен, 19 номинациянең берсендә яки берничәсендә проект әзерләп, 2019 елның 10 апреленә кадәр www.moyastrana.ru сайтында гариза тапшырырга кирәк.

Конкурс яшьләрне Россия төбәкләрен, шәһәрләре һәм авылларын социаль-икътисадый яктан үстерүгә җәлеп итү максатында үткәрелә. 19 номинация арасында “Минем илем”, “Минем шәһәрем”, “Минем авылым”, “Минем гаиләм”, “Интеллектуаль милек – илемнең киләчәге”, шулай ук “Минем туган телем”, “Илемнең экологиясе”, “Минем педагогик инициативам” һ.б. бар.

Җиңүчеләр июньдә Петербург халыкара икътисадый форумында игъдан ителәчәк. Бүләкләр арасында: стажировкалар, белем алуга грантлар һәм премияләр, остазга ия булу, БДИга, шулай ук бакалавриатка, магистратурага, аспирантурага керү имтиханнарына өстәмә баллар. 200 иң яхшы конкурсант махсуслашкан укыту үзәгендә белем алачак.

Катнашучыларны шулай ук социаль-икътисадый проектлау күнекмәләре һәм проектларны гамәли реализацияләү буенча лекция һәм семинарлар көтә.

Конкурс 2003 елдан бирле үткәрелә һәм 14-35 яшьтәге укучыларга, яшь педагогларга, белгечләргә, җирле оешмалар һәм яшьләр проектлары лидерларына адресланган.

Рузия Сафиуллина әзерләде