Көрәшчеләрдән ишкәкчеләр ясалмас, яки Казанга яшь көрәшчеләр җыела

Казанда яшьләр арасында көрәш буенча Россия беренчелеге көрәш сараенда узмый. Көрәшчеләрдән ишкәкчеләр ясалмас, дигән өмет бар әле.

15-16 һәм 17-18 яшьлек егетләр көрәш буенча Россия беренчелегендә катнашу өчен Казанның Спортның ишү төрләре үзәгенә (Центр гребных видов спорта) җыелачак. Әлеге объектта көрәш ярышларының узганы юк иде әле. Нигә, әйтик, беренчелекне үткәрү өчен башкаланың көрәш мәркәзе — “Ак Барс” Көрәш сарае сайланмаган – анысы билгеле түгел. Залы да махсус көрәш залларындагы кебек булмас, тамашачылар килә калса, аларга урын да булмас дигән куркыныч та бар. Һәрхәлдә, Россия кадәр Россия беренчелеген зуррак масштабта уздыру да комачау итмәс иде.

Күңелне борчыган тагын бер мәсьәлә бар. Билгеле булганча, алданрак 13-14 яшьлек егетләр арасында да ил беренчелеген уздыру планлаштырылган иде. Татарстанда әлеге яшьлек арасындагы яшүсмерләр "Сабантуй" газетасы призларына үткән бәйгедә көч сынашып, Россия беренчелегенә барам дип көрәшкән иде. Тик алга таба бу яшьлекләрне ил күләмендә көрәштереп тормаска булганнар. Башка төбәкләрдә әле бу яшьтәгеләр көрәшмидер дигән сылтау белән түгелме икән дигән сорау туа.

15-16 яшьлек егетләр арасындагы Россия беренчелеге тугыз үлчәү авырлыгында узачак: 45 кг., 50 кг., 55 кг., 60 кг., 65 кг., 70 кг., 75 кг., 80 кг. һәм 100 кг.га кадәр авырлык категорияләрендә. Әлеге ярышларда Татарстан данын “Сабантуй” журналы призларына узган ярышларның җиңүчеләре яклаячак.
17-18 яшьлекләр арасында исә республика данын “Татарстан яшьләре” газетасы призларына үткән бәйгенең җиңүчеләре яклар дип көтелә. Биредә авырлык үлчәүләре 55 кг.нан башлана, шулай ук 100 кг.га кадәр категория белән тәмамлана.

Шунысы да бар, ярышларда катнашу өчен һәр көрәшчедән 200әр сум кертем сорала.