«Кулыма китап алам» күргәзмәсендә ни булачак?

2019 елның 15 ноябрендә 14.00 сәгатьтә Г.Тукай әдәби музеенда «Кулыма китап алам» дип исемләнгән күргәзмә ачыла. Күргәзмә «Габдулла Тукай мәҗмугаи асаре» китабы басылуга 105 ел тулуга багышлана. 
2019 елда Г.Тукайның иҗат итә башлавына 115 ел тула. Г.Тукайның 2011-16 елларда басылган алты томлы академик басмасында аның иҗади эшчәнлеге башлану елы итеп нәкъ менә 1904 ел күрсәтелгән. Күргәзмәнең темасы итеп шагыйрьнең соңгы китабы алынган. Бу китапны Тукай беркайчан да кулларында тотмаса да, җыентыкны әзерләүдә үзе катнашкан. Күргәзмә шагыйрьнең беренче сайланма әсәрләре дип саналган «Г.Тукай мәҗмугаи асаре» китабының тарихын ачыклый.
Күргәзмәнең ачылышына татар теле һәм әдәбияты укытучыларының Г. Тукай әдәби музее һәм Казан шәһәре Мәгариф идарәсе каршында эшләп килүче “Туган тел” клубы вәкилләре, КФУ һәм ТӘһСИ галимнәре, Тукай фәнен өйрәнүчеләр чакырыла.