КЫШ БАБАЙНЫ КҮРЕРГӘ МУЗЕЙГА БАРАБЫЗ

Татарстан Республикасы Милли музее 19 декабрьдән 5 гыйнварга кадәр балалар өчен «Бервакыт Яңа ел алдыннан...» дип исемләнгән күңел ачу тамашасы оештыра.

Сезне тылсымлы Яңа ел могҗизасында Кыш бабай һәм Кар кызы белән очрашу көтә. Алар килгән нәни кунакларга искиткеч кызык Әкияткә ишек ачачак, ди музей хезмәткәрләре. Татарстан Республикасы Милли музеенда тупланган элекккеге экспонатларның уникаль коллекциясе Сезне яңа ел атмосферасына күмәчәк. Музей «Кар бөртеге патшалыгында, боз дәүләтендә» дип аталган яңа ел күргәзмәсе белән таныштыра, ә тамашадагы тарихи геройлар «Борынгы заманнардан алып безнең көннәргә кадәр Татарстан тарихы» дип аталган  музейның яңа экспозициясе буенча квест-уен уздырачак.

Яңа ел программасының максаты - музей экспозициясе ярдәмендә  интерактив уен аша тарих һәм сәнгать дөньясы белән таныштыру. Һәр катнашучы яраткан геройлары белән фотога төшә һәм үзенә эксклюзив бүләк ясый алачак.