Кыярың уңсын дисәң

Июнь аенда кыярны дөрес итеп карасагыз уңыш мул булыр. 

Кыярны теплицада һәм ачык һавада үстерүчеләр бар. Теплицада үстерүнең үз кагыйдәләре бар. Мәсәлән ачык һавада утырган кыярының яфракларын бик өзмәскә кирәк. Ә теплицада үскән кыярның артык сабакларын кисеп торырга кирәк. Су сибү тәртибе дә аерыла.

1. Теплицада үскән кыярга суны иртән, кояш кыздыра башлаганчы сибегез. Ачык һавада утырган кыяр түтәленә суны кич сибү хәерлерәк. Су сипкәндә, су кыяр төбенә генә түгел яфракларына да эләксен. 

2.Кыярларның буе 30 см.га җиткәнче аны бәйләргә һәм түтәлне формалаштырырга кирәк. Ачык һавада җәелеп үскән кыярны кайберәүләр бәйләми, шулай да яртык сабакларын кисеп кыярны кирәк якка сузырга була. 

3.Кыяр чәчәкләре күренә башлагач, артык ботакларны һәм яфракларны кисергә кирәк.  Төп сабакны калдырып, артык, вак һәм төрле  якка үсүче сабакларны сак кына кайчы белән кисеп алыгыз.

4.Кайчакта теплица ишеген ачык тотарга онытмагыз. Кыяр чәчәген дә бал кортлары һәм башка бөҗәкләр серкәләндерә. 

5.Кечкенә генә кыярлар күренә башлаган түтәлгә суны күбрәк сибәргә кирәк. Ул вакытта кыяр очлары ачы булмас.

6.Сирәк кенә кыярларга сөтле су сибәргә була. Сөтне 2/1 су белән кушып ике атнага бер мәртәбә кыяр төбенә сипсәгез, кыяр тизрәк үсеп китәр.

7.Кыярны вакытында җыеп барырга онытмагыз. Бау белән бәйләнмәгән кыяр сабакларын күтәреп карарга онытмагыз.