Әлмәт, Чүпрәле, Лениногорски - Татарстан районнары буйлап узган давыл өй түбәләрен очырган (видео)

24 июньдә Әлмәт, Чүпрәле, Лениногорски - Татарстан районнары буйлап көчле давыл узды, зур зыян килгән. Өй һәм гараж түбәләре очып машиналарга төшкән. Тәрәзәләрне ваткан.

Бөгелмәдә һәм Нурлатта көчле җил түбәләрне куптарган һәм калайлар машиналар өстенә төшкән. Берсенең кыйммәтле иномаркасына түбә ишелгән. Шөкер, хуҗасы зыян күрмәгән.  Нурлатта чыккан җил Совет урамындагы склад бинасының түбәсен куптарган. Калайлар унынчы модель «Лада» һәм «Деу Нексия» машиналары өстенә килеп төшкән. Купкан түбә 50 квадрат метр зурлыктагы профнастил булган.   Биналарның түбәләрен ремонтлау эшләре зыянны бәяләгәннән һәм подрядчылар килгәннән соң, 25 июньдә башланачак.   Чүпрәле һәм Лениногорск районнарында көчле җил йортларның һәм мәктәпнең түбәләрен җимергән. Городище авылында Ленин һәм Клара Цеткин урамнарындагы ике торак йорт һәм сарай түбәсенә өлешчә зыян килгән. Хуҗалар түбәләрне үз көчләре белән төзәтәчәк.   Моннан тыш, Урмышлы бистәсендә Үзәк урамда җил гомуми белем бирү мәктәбе түбәсен алып аткан, - дип хәбәр итә Матбугат, Татар-информ агентлыгына таянып.