Әлмәткә кемнәрдер бармаска җыена?

Командалар арасындагы "Стенка на стенку" ярышлары быел да Әлмәттә узачак. Дөрес, беренче уналтылыкка кергән командаларның кайберләре ярышка килмәскә дә мөмкин.

"Алтын сөлге" исеме астында "Татнефть" оешмасы призларына үтәчәк бәйгедә, узган елгы кебек үк, быел да уналты команда көч сынашачак. Командалар җиде үлчәү авырлыгында туплана. Әлмәт җирлегендә көрәш үсеше өчен җаваплы җитәкчеләрнең берсе Ильяс Галимов белдергәнчә, беренче, икенче, өченче, дүртенче урынны яулаган командаларның һәр көрәшчесенә саллы гына приз фонды каралган. Әйтик, беренче урынны яулаган команданың һәрбер көрәшчесенә 30 мең сум акчалата бүләк каралган. Моннан тыш, оештыручылар тренерларга да акчалата бүләк бирәчәк.

Турнир исә 22-23 март көннәрендә "Татнефть" спорткомплексында узачак.

Безгә килеп ирешкән кайбер имеш-мимешләргә ышансаң, узган ел Татарстанның көрәш федерациясе календаренә кертелгән ярышлар нәтиҗәләрендә беренче уналты команда арасына кергән кайбер коллективлар Әлмәткә барып тормыйбыз, барыбер оттырачакбыз дип фикер йөртә икән.

Әлегә исә узган ел кайсы команданың ничәнче урын алуларын тәкъдим итәсе килә:

1. Әлмәт
2. Зәй
3. Теләче
4. Арча
5. Яңа Савин
6. Лаеш
7. Балтач
8. Кукмара
9. Азнакай
10. Мамадыш
11. Саба
12. Биектау
13. Түбән Кама
14. Балык Бистәсе
15. Актаныш
16. Чирмешән