“Мулла” Нижгар якларына сәфәр тота

16-18 көннәрендә Татарстанда төшерелгән “Мулла” фильмы Түбән Новгород өлкәсендә күрсәтеләчәк. Фильм Түбән Новгород өлкәсенең Кече Рыбушкино авылы мөселманнарының дини оешмасы һәм Түбән Новгород  “Татар милли үзәге” иҗтимагый оешмасы соравы буенча күрсәтелә.

Мәгълүм булганча, “Мулла”  14нче Казан халыкара мөселман киносы фестивалендә "Тулы метражлы нәфис фильмда иң яхшы режиссер эше" номинациясе лауреаты исеменә лаек булган иде. Фильм режиссерлары – Рамил Фазлыев һәм Әмир Галиәскаров  кинофестивальнең иң яхшы режиссерлары дип танылды. Татарстанның Әтнә районында төшерелгән "Мулла" фильмының генераль продюсеры – Миләүшә Айтуганова, продюсеры һәм композиторы – Марат Әхмәтшин, операторы – Юрий Данилов. Төп рольдә (Әсфәндияр) – Әтнә театры режиссеры Рамил Фазлыев. Фильмда шулай ук Русия актеры, чыгышы белән Нижгар ягыннан булган Марат Бәшәров та катнашты. Әлеге факт, ихтимал, Нижгар ягындагы милләттәшләрнең "Мулла" белән кызыксынуын арттыргандыр.

"Мулла"ны күрсәтүләр дәвамында фильмның иҗат төркеме белән очрашулар, аерым алганда, Рамил Фазлыев белән нижгарлыларның җанлы һәм ихлас аралашуы булыр, дип көтелә. Әлеге мәдәни чара ТР Мәдәният министрлыгы ярдәмендә оештырыла.