Муса Җәлил һәм Илһам Шакировка багышланган «Татар уллары» мәдәният атналыгы марафоны игълан ителә

15 февраль – татар халкының каһарман язучысы, бердәнбер Ленин орденына лаек булган шагыйребез, Советлар Союзы Герое Муса Җәлилнең һәм татар халкын берләштерүгә бөтен гомерен багышлаган, татар моңын дөньяга танытучы легендар җырчыбыз Илһам Шакировның туган көннәре.

Шушы уңайдан Бөтендөнья татар конгрессы һәм милләтебезнең затлы, зыялы шәхесләре бөтен дөньяга сибелеп яшәүче халкыбызга мөрәҗәгать итә. Агымдагы елның 15 февраленнән без Муса Җәлил һәм Илһам Шакировка багышланган мәдәният атналыгы марафонын игълан итәбез. Төрки-татар халкы яшәгән һәр төбәктә, мәдәният сарайларында, белем бирү учакларында, җәмәгать оешмаларында, үзэшчән сәнгать, фольклор ансамбльләрендә, китапханәләрдә, гаиләләрдә шушы бөек шәхесләребезнең шигырьләрен, җырларын яңгыратыйк, тормыш юллары турында сөйлик, истәлекләр белән уртаклашыйк, мәчетләрдә рухларына багышлап дога кылыйк.

Бу изге гамәлләребез хәтерләребезне яңартсын, күңелләребездә батыр, мәшһүр улларыбыз белән горурлану хисләрен уятсын. Халкыбызның борынгы һәм бөек тарихлы булуын,  көчле дәүләтләрнең дәвамчылары, мирасчылары булуын искәртсен, үзаңыбызны арттырсын, безгә көч-куәт бирсен, төрки-татар дөньясын тагын да берләштерсен, бер йодрыкка төйнәсен. Башкарылган әлеге әсәрләр Муса Җәлил һәм Илһам Шакиров рухларнына дога булып ирешсен. Без сездән видеоязмаларыгызны көтәбез.

Катнашучыларның М.Җәлил шигырьләрен укып яки яттан сөйләгән, Илһам Шакиров репертуарындагы җырларны башкарган, мәшһүр талантларыбыз турында истәлекләр белән уртаклашкан видеоязмаларын #татаруллары2023 дигән хештег куеп, үзләренең Вконтакте (https://vk.com) социаль челтәрендәге шәхси битләрендә урнаштырырга чакырабыз.

Мәдәният атналыгы марафонынының идея авторы һәм җитәкчесе – Муса Җәлил премиясе лауреаты, Татарстанның халык артисты, Кырым Республикасының атказанган сәнгать эшлеклесе Гөлзадә Сафиуллина.

Өстәмә сораулар булган очракта gulzadasafiullina1946@gmail.com  электрон почтасына мөрәҗәгать итә аласыз.

Чыганак: Бөтендөнья татар конгрессы