“Бәллүр каләм – 2019” журналистика бәйгесенең җиңүчеләре билгеле

«Пирамида» күңел ачу үзәгендә Татарстан республикасының әйдәп баручы журналистларын үз эченә җыйган «Бәллүр каләм» бәйгесе егерме икенче тапкыр үткәрелде. Шуны әйтеп үтәргә кирәк: бәйге кысаларында бүгенге каләм осталарын гына түгел, ә татар журналистикасының башында торган журналистлар да искә алынды. Холлда аларның фотосүрәтләреннән күргәзмә ясалган иде.

ТНВ телеканалының генераль директоры Илшат Әминов әлеге бәйрәмнең иҗади һәм бернәрсәгә дә битараф булмаган кешеләрнең бәйрәме икәнен әйтеп үтте. «Әлеге кешеләр үзләре өчен профессия итеп искиткеч өлкәне сайлаганнар. Биредә үз эшләрен чын күңелдән, йөрәк түреннән эшләүчеләр. Владимир Путинның сүзләре белән килешәсем килә: «Тәнкыйтьне беркем дә яратмый, аны хәтта күралмыйлар, ләкин бары тик акыллы кешеләр генә, алга таба дөрес адымнар ясар өчен, кабул итә ала. Шуңа күрә бары тик акыллы укучы өчен генә эшләргә һәм чын журналистика булдырырга кирәк», — дип Илшат Әминов залны сәламләде.

«Иң яхшы журналист» номинациясендә «Эфир» телекомпаниясе хезмәткәре Кулешов Алексей Николаевич һәм «Татар-информ» мәгълүмат агентлыгы журналисты Рүзилә Мөхәммәтова җиңделәр. Алексейга әлеге исем үлгәннән соң бирелде. Диплом һәм сын аның әнисенә тапшырылды.

Бәйрәмне «Ак идел» коллективы, Игорь Крутой академиясе балалар хоры һәм Алсу Әбелханова бизәделәр.

«Елның иң яхшы редакциясе» номанициясендә «Казан» журналы һәм «Чаллы хәбәрләре» («Челнинские известия») җиңү яулады. «Һөнәргә тугрылык өчен» язучы Камил Кәримов җиңде. «Туган тел» номинациясендә Юлия Дәүләтбаева («Тукан як» газетасы, Октябрьский шәһәре, Башкортстан Республикасы) җиңүче булып игълан ителде. «FIFA Футбол буенча дөнья чемпионаты — 2018» спецпроектында ФГУП ВГТРК «ГТРК «Татарстан» филиалы җиңсә, «Россия Федерациясендә волонтер елы» проектында «Кайбыч таңнары» («Кайбицский зори») газетасы җиңде. Шулай ук «Шиһабетдин Мәрҗани тууына 200 ел» проектында «Яңа Гасыр» телерадиокомпаниясе, «Әдәби хәзинә» тапшыруының иҗат төркеме бүләкләнде. «Объектив аша караш» номинациясендә Алексей Вангаев («Таң» газетасы Алексеевск районы), Ринат Сафин («Яңа Гасыр» телерадиокомпаниясе) җиңү яулады.

«Татарстан Республикасында Лев Толстой елы» номинациясендә «Мамадыш ТВ» телеканалы, «Мамадыш-информ» җиңде. Аларны ТР Язучылар берлеге рәисе Данил Салихов тәбрикләде. «Сез безнең күзне ачучылар, дөньяны танытучылар. Киләчәктә дә безнең күзләрне дөньяга ачык тотуыгызны телибез. Сезнең кыйммәтегезне дәүләтчелегебез аңлап яшәргә тиеш. Сез кызык та, куркыныч та, туры сүз әйтеп эшләүче һөнәр ияләре», — дип әйтте ул.

«Татарстан журналистикасында талантлы, иҗади, җаваплы кешеләр эшли. Ышанам: яңа массакүләм мәгълүмат чаралары үсеше чорында басма матбугат элеккечә актуаль булып, аңа ихтыяҗ сакланачак, һәрвакытта эш сыйфаты, нәтиҗәлелеге үрнәген күрсәтәчәк», — дип журналистларны якынлашып килүче «Матбугат көне» белән ТР Премьер-министры Алексей Песошин котлады. Әлеге котлауларны ул Татарстан Президенты Рөстәм Миңнеханов исеменнән җиткерде.

«Бәллүр каләм — 2019» бәйгесенең гран-при яисе булып «Татарстан» ДТРК милли тапшырулар хезмәте башлыгы Миңназыйм Сәфәров табылды. Аның исемен Алексей Песошин игълан итте. Миңнызыйм Сәфәровка «Лада гранта» автомобиле ачкычлары тапшырылды.

Конкурсны оештыручылар — «Татмедиа» Республика матбугат һәм массакүләм коммуникацияләр агентлыгы һәм Татарстан Журналистлар берлеге.

ТНВ