Өлешчә мобилизациядән чит илгә качып китүчеләрнең тормышын кырысландырмакчылар

Федерация Советының Дәүләт төзелеше һәм конституцион законнар комитеты башлыгы Андрей Клишас фикеренчә, өлешчә мобилизация сәбәпле илдән качып китүчеләргә чит илләрдә тормышларын катлауландырырга мөмкиннәр. Бу хакта “Ведомости” яза.

Сенатор билгеләп үткәнчә, мондый кешеләрнең күбесе Россия компанияләрендә читтән торып эшләүләрен дәвам итә.

– Кемнәргәдер чит илләрдә эшләү, ә акчаны бездән алу мөмкинлеге биргән законны үзгәртә алабызмы? Әлбәттә, үзгәртә алабыз, – дип белдергән ул.

Клишас фикеренчә, чикләүләр иң элек икътисадның “сизгер” өлкәләренә – аерым алганда, транспорт иминлегенә һәм дәүләт секторына кагылырга тиеш.

– Киткән кешеләрне кире кайтырга күндереп маташырга кирәкми. Әмма аларның кире кайтуына да комачаулап булмый – Конституциягә каршы килә бу, – дип искәрткән сенатор.

Чыганак: Ватаным Татарстан