Пицца - Маргарита

9 февраль - Халыкара пицца көне. Әлеге ризыкны пешерүдә һәр илнең үз кулинар өстенлекләре бар. Әйтик, берәүләрнең яраткан ризыгы - борщ, кайберәүләрнеке - камырлы ризык булса, ә кемнәрдер аеруча пиццаны ярата. Пицца -  итальяннарның милли ризыгы буларак популярлык казанды. Бүген бу кулинария "шедевры"н яратучылар яраткан ризыкларының туган көнен бәйрәм итәләр. Ә без Маргарита пиццасын пешерергә булдык.

Ингредиентлар:

Он - 250 г
Коры чүпрә -  10 г яки 1/3 пакет
Шикәр (тәм өчен)
Тоз (тәм өчен)
Зәйтүн мае
Помидор - 2 данә
Сыр - 150 г
Базилик яфрагы 12 данә
Зәйтүн мае - (эчлек өчен) 3 аш кашыгы
Тоз, борыч (тәме буенча)

Камыр.  Чүпрә, шикәр һәм 2 аш кашыгы җылы суны бергә болгатабыз. Он өстәп, өстен сөлге белән каплыйбыз һәм 30 минутка җылы урынга куябыз.
Камырга 125 мл җылы су өстәп, йомшарганчы басабыз. Ул кулга ябышырга тиеш түгел. Аннары соң яңадан сөлге белән каплап, бер сәгатькә  җылы урынга куябыз. Камыр ике тапкырга зураерга тиеш. Ике өлешкә бүләбез.

Эчлек. Помидорларны 1 минутка кайнар суга салып, кабыгын чистартабыз. Помидор һәм сырны шакмаклар итеп кисәбез. Духовканы  230 с. кадәр җылытабыз. 

Камырны 28 см диаметрлы итеп кисәбез, зәйтүн мае белән майлыйбыз һәм он сибәбез. Камырга помидор, сыр тезәбез һәм тоз, борыч сибәбез, зәйтүн мае сылыйбыз. 15-20 минут пешергә куябыз. Әзер пиццаны сыр, базилик яфраклары белән бизибез.

Тәмле булсын!