Президент катнашындагы көрәш. Изге Болгар җыены җиңүчеләре

Бүген Шәһри Болгар каласында узган Изге Болгар җыены кысаларында тарихта беренче тапкыр көрәш ярышлары да оештырылды.

"Безнең максат - җыен кунакларына татар халкының көрәшен күрсәтү, - дигән Россиянең Көрәш федерациясе спорт директоры Илнар Галиев "Татар-информ"га. - Ислам динендә көрәш - сөннәт гамәл. Татар халкының гасырлардан килә торган көрәш ярышын мөмкин кадәр күп кеше күрергә, белергә лаек. Хәзер көрәш шактый популярлаша бара. Болгар җыены кунакларына бу ярышларны күзәтү кызык булыр дип уйладык".

Әлбәттә, беренче коймак бәлки төерле дә булгандыр, катнашучылар саны да артык күп түгелдер, әмма милли көрәшебез шушы изге җирдә урын алган икән, моңа сөенергә генә кирәк. Шунысы да бар, ярышларны Татарстан Президенты Рөстәм Миңнеханов җитәкчелегендә олуг кунаклар да тамаша кылды. Президентыбызның көрәшне кызыксынып күзәтеп утыруын да, соклануын да чамаларга була. Эш шунда ки, ул үзенең Инстаграмдагы аккаунты аша татар көрәшен меңләгән халыкка, шул исәптән, Россия, дөнья дәрәҗәсендәге кешеләргә дә күрсәтеп барды.

Җиңүчеләргә килгәндә, 70 кг.га кадәр авырлыкта беренче урынны Ислам Фәлахов яулады. Икенче урында - Илнар Муллахмәтов. 90 кг.га кадәр авырлыкта Булат Әхмәдиев - беренче, Илмир Төхвәтуллин - икенче. Авыр үлчәүдә Лениз Абдуллин - җиңүче, Дамир Адиятуллин икенче. Җиңүчеләрнең тулы исемлеген соңрак хәбәр итәрбез.

Фото һәм видеоларны Рөстәм Миңнеханов аккаунтында карарга мөмкин.