Рафис Борһанов ата-аналар белән берлектә тарихтан БДИ бирде

“Ата-аналар белән БДИ” акциясе 2017 елдан бирле бара. Быел Татарстанның Мәгариф һәм фән министры, Дәүләт Советы депутатлары, Г.Камал театры актерлары белән берлектә, В.А.Григорьев исемендәге 81 номерлы рус-татар мәктәбендә имтихан биреп карады. Узган елларда, гадәттә, рус телен тапшыра торган булганнар.
- Минемчә, тарих фәне бик дөрес сайланды. Безгә һәрвакыт үзебезнең кайда булуыбыз, безгә хәтле нәрсә эшләгәннәрен аңларга кирәк, шул вакытта гына без балаларыбызга үгет-нәсыйхәт бирә алачакбыз. Тарихсыз беркая да барып булмый, - диде Рафис Тимерхан улы.
Акция кысаларында ата-аналар гына түгел, барлык теләгән кеше БДИ тапшырып карый алачак. Моның өчен мәктәптә яки үз районыгызның мәгариф идарәсендә гариза тутырырга кирәк. Акция 2 мартка кадәр дәвам итәчәк.
- Бу Россиякүләм акция. Аны Рособрнадзор һәм Мәгариф министрлыгы ел саен уздыра. БДИның күңелгә ятышсыз образыннан котылу өчен эшләнә ул. Ул гадәти имтихан. Мин инде анда дүртенче тапкыр катнашам һәм ата-аналар, балалар әйткән кимчелекләрнең кими барганын күрәм, - дип өстәде Татарстанның мәгариф һәм фән министры Рафис Борһанов.

Фото:http://mon.tatarstan.ru/