Равил Бикбаев вафат

Башкортстанның халык шагыйре, профессор, Башкортстан фәннәр академиясе әгъза-корреспонденты, Салават Юлаев премиясе лауреаты, әдәбият белгече Равил Бикбаев вафат булган. Әдип 81нче яшендә Уфада озакка сузылган авырудан соң бакыйлыкка күчкән. Аның белән хушлашу пәнҗешәмбе көнне сәгать унбердә республика парламенты бинасында узачак. Бу хакта ТАСС агентлыгы хәбәр итә.

Равил Бикбаев 1938 елда Оренбург өлкәсенең Югары Кунакбай авылында дөньяга килә. Уфа дәүләт университетын тәмамлый, СССР Фәннәр академиясе Башкортстан филиалының Тарих, тел һәм әдәбият институтында аспирантурада белем ала. "Хәзерге башкорт поэмасы" темасына кандидатлык диссертациясе, 1996 елда докторлык хезмәтен яклый. 1995 елдан Башкортстан Республикасы Язучылар берлеге идарәсен җитәкли. Иҗат белән студент чакларыннан шөгыльләнә. 30лап китап авторы, әсәрләре алман, төрек, украин, казах, якут, чуваш, алтай һәм башка телләргә тәрҗемә ителгән.