Разил Вәлиев Илһам Шакиров белән эшләве турында

Күптән түгел Калеб яңа буын җыены яңа проект башлап җибәрде. Шул проект кысаларында шагыйрьләр, җырчылар һәм көйязарлар  Халык язучысы Разил Вәлиев белән очрашты.

Разил әфәнде бик күп популяр җырлар авторы да ул. Язучы үзенең җыр сүзләре яза башлавы тарихын сөйләде, киңәшләре белән уртаклашты, һәм иң мөһиме, уңышының сере ихласлылыкта булуын аңлатты. Очрашуда Разил абый танылган җырчы Илһам Шакиров белән эшләве турында да сөйләде:

– Кабинетымда эшләп утырганда бүлмәмә Илһам абый килеп керде. "Синең шигырьләреңне "Казан утралары"нда укыдым, ошады. Хәзер пластинка яздырам, 7 җырым бар, бер җырымның көе генә бар. Шул көйгә сүзләр кирәк.  Миңа җыр язып бирмәссең микән", – диде. Мин, әлбәттә, ризалаштым. “Илһам абый, сез әйткәч, язмыйча булмас, күпме вакыт бирәсез миңа? Бер аймы, ике аймы?” – дидем. Илһам абый көлеп куйды. “Нинди ике ай, мине аста такси көтеп тора. Сәгать ярымнан әйләнеп кайтырмын, син шигыреңне язып, машинкада бастырып (ул вакытта компьютерлар юк иде) бирерсең”, – диде. Шулай итеп минем беренче җырым язылды. Җыр язу сәнгатенең беренче сабакларын бирүче дә Илһам абый булды. Илһам абыйга язган җырларымның берсе "Бер алманы бишкә бүләек" иде. Җырның сүзләрен Илһам абыйга бирдем, ул карап чыкты. Бераздан шалтыратып: “Сүзләре бик ошады, көйгә салып җырлап карадым. Ләкин бер җирендә син "Кар аклыгы гөлгә күчкән" дип язгансың. Шигырь итеп укыганда әйбәт ул, ә менә җырлаганда "караклыгы" дип ишетелә. Мин “караклык” дип җырлый алмыйм бит инде. Шулай итеп, без ул җырда "Кыш аклыгы гөлгә күчкән" дигән вариант калдырдык. Шуннан соң Илһам Шакиров җыр сүзләрендә ике ачык аваз бергә килмәсә яхшырак булуын аңлатты. Ягъни бер сүз сузык авазга бетеп, икенче сүз дә шул ук сузыкка башланса, алар кушыла. Һәм җырчыга пауза ясарга туры килә. Хәер, андый урыннар "Туган тел"дә дә бар.