Ренас, туган көнең белән! (ФОТОЛАР)

Бүген татарның асыл егетләреннән берсе Ренас Кәлимуллинның туган көне. Килешәсездер, соңгы берничә ел эчендә ул көрәш сөючеләренең олы хөрмәтен яуларга өлгерде.

Ренас Кәлимуллин бүген, кечкенә генә булса да, 25 яшьлек юбилеен билгеләп уза. Көрәш җәмәгатьчелегенә ул Менделеевск егете буларак танылды. Баштарак билбаулы көрәш буенча танылып, аннан инде татарча көрәштә дә үзен танытты. Өйләнгән. Тормыш иптәше - Айсылу. Айсылуны без көрәш ярышларында еш күрәбез, үзенә күрә талисман ролен дә үти кебек ул. Узган ел ахырында республика ярышларында Ренасның энекәше дә көрәштә күренә башлады.

Узган ел Кәлимуллин үзенчәлекле рекордлы күрсәткечкә ия булды. Татарча көрәш, билбаулы көрәш һәм Алыш көрәше буенча дөнья чемпионы булып танылды. Билбаулы көрәш буенча биш тапкыр дөнья чемпионы инде ул, халыкара класслы спорт остасы. Көрәш буенча Россиянең спорт остасы. Узган ел күрсәткечләре буенча 2018 елның иң яхшы көрәшчесе. Аннан алдагы елда да шундый ук титулга ия булды, алай гына да түгел, тамашачылар мәхәббәтен яулаган көрәш дип тә танылды.

Ренасны туган көне белән котлыйбыз һәм яңадан яңа җиңүләр, тормышындагы тынычлык, бәхетле көннәр телибез!