Республиканың әдәби премияләренә кемнәр тәкъдим ителгән?

Бүген Татарстан Язучылар берлегенең идарә утырышы узды. Утырышта республиканың әдәби премияләренә дәгъва кылучылар ачыкланды.

Бүгенге утырышта Г.Тукай исемендәге Дәүләт премиясенә, Г.Исхакый, Һ.Такташ, Ф.Хөсни, Җ.Вәлиди, Т.Миңнуллин исемендәге әдәби премияләргә Татарстан Язучылар берлеге үз кандидатларын тәкъдим итте. Безгә килеп ирешкән хәбәрләргә караганда, хәлләр болайрак:

Исхакый премиясенә - Рәдиф Сәгъди, Фатих Хөсни премиясенә - Җәүдәт Дәрзаман, Һади Такташ премиясенә - Флера Гыйззәтуллина, Җамал Вәлиди премиясенә - Фәрит Яхин, Туфан Миңнуллин премиясенә Әмир Камалиев тәкъдим ителгән. Хәзер әлеге кандидатларны республиканың мәдәният министрлыгы расларга тиеш булачак. Хәер, утырышта министрлыктан да вәкил катнашканлыктан, премия ияләре инде билгеле дип әйтергә дә мөмкиндер.

Ә менә республиканың иң дәрәҗәле бүләге - Г.Тукай исемендәге Дәүләт премиясенә өч кандидат узган: Галимҗан Гыйльманов, Тәлгат Галиуллин, Марат Әмирханов. Анысы өчен көрәш әле дәвам итәчәк. Идарә утырышында шулай ук Р.Шәрипов, Р.Кәрами, Ә.Гаффар, Р.Низами кандидатуралары да каралган.

ФОТО: Безнең мирас