Ришат Төхвәтуллинның тавыш операторы табылды. Егет кайда булган?

Җырчы Ришат Төхвәтуллинның тавыш операторы Артур Гобузовның югалуы турныда язган идек. Егет табылган. Питерга ук барып җиткән...

«Артур дигән тавыш операторыбыз табылды, ниһаять. Питер шәһәренә барып җиткән. Концертыбыз башланырга ике сәгать кала, без аны югалткан идек. Берәр проблемасы килеп чыккандыр, дип уйладык. Әле ярый безнең егетләр профессионаллар. Нәркис дигән егетебезне тавыш операторы итеп утырттык. Артурны ике көн эзләдек, полициягә дә мөрәҗәгать иттек. Бөтен җиргә хәбәр бирдек, телевидениегә дә. Бу егет үзе элемтәгә чыкты. Питерга барып җиткән. Минем белән сөйләшмәде, биюче егетебезгә генә киемнәрен җибәрүен сорап шалтыраткан. Бу хәл аның белән инде беренче тапкыр гына түгел икән. Дуслары безгә язды, имтиханнар вакытында да ул аларны уңайсыз хәлдә калдырган булган. Ул безнең пультның настройкаларын бетергән дә, нишләргә белмичә, чыккан да киткән. Хезмәт хакы алган вакыт иде, кыйнап ташламадылармы икән, дип борчылдык. Иң мөһиме исән-сау! Кадерле тамашачым, сезне борчыган өчен гафу итегез. Безнең белән бергә булдыгыз, рәхмәт сезгә!», - дип сөйли Ришат үзенең инстаграм битендә.