Русиягә Кытай смартфоннарын китерми башлаганнар

Руссиягә Huawei, Xiaomi, Vivo, Realme, ZTE һәм Lenovo җитештерүчеләре, коронавирус килеп чыгу сәбәпле, гаджетлар китерү вакытын күчерә башлаганнар. Бу шулай ук Apple продукциясенә дә кагыла.

Белгәнебезчә, Кытайда Яңа ел каникуллары озайтылды. Алар ким дигәндә 10 февральгә кадәр эшләмәячәк. Эпидемиологлар вирусның чыганагы Ухань шәһәрендәге базарда сатыла торган кыргый хайваннар булуын ачыклаганнар иде. 30 гыйнварга булган мәгълүматларга караганда, авырулар саны 7,8 меңнән артып киткән, 200дән артык зарарланган кеше үлгән. КХРдан тыш, зарарлану очраклары Япония, Көньяк Корея, Таиланд, АКШ, Германия, Австралия, Финляндия һәм Франциядә теркәлгән. Русиядә исә әлегә ачыкланмаган, әмма Ерак Көнчыгышта Кытай белән чикләрне ябарга булганнар.