САМАРА ЕГЕТЕ КОМАНДАГА АЛТЫН МЕДАЛЬ КИТЕРДЕ!

Самара өлкәсенең Камышлы авылында яшәүче спортчы катнаш эстафетада командага алтын медаль китерде. Ярышлар Оберхоф шәһәрендә узды, дип яза "Татар-информ". Бу турыда Бөтендөнья татар конгрессы хәбәр иткән.

«Хисләр бик көчле. Әле аңлый алмыйм. Команда, ил өчен бик шат, без бүген алтынга ирештек. Команда бик шәп иде, афәрин. Безгә бу уңышка ирешүдә ярдәм иткән һәркемгә рәхмәт», - ди Эдуард Латыйпов.

Биатлончы, Россия җыелма командасы составы әгъзасы, 2019 елгы кышкы Универсиада чемпионы, юниорлар арасында дөнья һәм Европа чемпионы Эдуард Латыйпов дөнья кубогы этабында Россия җыелма командасына җиңү китерде.

26 яшьлек спортчы ярышның йомгаклау этабына тренерлар штабы тарафыннан куелган иде. Соңгы атудан дистанциягә өченче булып китеп, ул финиш сызыгында Франция һәм Норвегиядән көндәшләрен узып китте.