Сайлау участогында – блогерлар

Быел блогерларны сайлауларда күзәтүче сыйфатында җәлеп иттеләр. 

Блогерларның эше язучыныкыннан бер дә ким түгел. Каләм ияләре, әсәрдәге вакыйгалар үз юлын алды, аларны үзгәртергә инде хәлемнән килми, дигәнне ишеткән бар. Блогерлар да шул хәлдә. Иртән торуга аның ниләр ашаганын, нинди урынга барган, кемгә нинди мөнәсәбәтен белдергәнен язылучылары көтеп кенә тора. Быел менә сайлауларга да җәлеп иткәннәр үзләрен. Шул вакытта аудиторияләрен гайрәтен чигермәделәр микән? Гадәттә, сәясәт белән көнкүреш икесе ике юнәлеш ләбаса. 
Алинә Гыймалтдинова сүзләренә караганда, аның бу гамәлен язылучылары бик уңай кабул иткән. Хәтта бер меңгә якын яңа язылучылары өстәлгән дә. 
– Яңа статуска керешү дулкынландыргыч булды, – дип уртаклашты блогер бу гамәле турында журналистларга. – Яңа өлкә, артык җаваплылык таләп ителә. Гыйлем алганнан соң, тынычланып яңа вазифама алындым. Һәркайсыбыз үз сайлау участогында эш алып барды. Минемчә, иң мөһиме – кызыксыну зур булып, язылучыларымнан фикерләр алу булгандыр. Әгәр инде, уңай фикерләр күбрәк икән, монысы аеруча кыйммәтле бит!
Алинәгә, нигездә, сайлау участогында битлекләр биреләме-юкмы кебек сораулар юллаучылар күбрәк булган. Онлайн режимда сорау-җавап алу күпкә уңайлырак булуын кыз үзе дә яшерми: 
– Сайлау участогында тавыш бирүнең ничек баруын онлайн-режимда күрсәтеп бардым. Барлык чаралар да күрелгәнме, халык агымы ничек? Язылучыларым мине кызыксынып күзәтте. Дөрес, баштарак, блогерлар өчен гадәти булмаган контент, дип бик борчылган идем. Әмма күбесе минем иҗтимагый чараларда, социаль проектларда актив катнашуыма, хакимият белән халык очрашулары оештыруыма ияләшкән. Ниндидер зур яңалык дип кабул итмәделәр.