Ә син алмадан тәбә һәм рулет ясый беләсеңме?

Алма алма инде ул, нишләтәсең аны… Ашаганын ашап, ашамаганыннан варенье ясап, сок сыгып яки как ясап куясын. Берничә мәртәбә шарлотка белән ала бәлеше пешерергә була диярсез, юк шул, алай түгел икән, алмадан да әллә нәрсәләр ясап була! Менә сезнең алма тәбәсе яки алма рулеты ашаганыгыз бармы?

Алма тәбәсе

5 алма («Антоновка» сорты яхшырак),

50 грамм атланмай,

2 аш кашыгы шикәр комы,

5 йомырка.

Алманы чистартып үзәген алыгыз һәм дүрткә бүлеп кәстрүлгә салыгыз. Шунда ук май, шикәр комы да салына. Алмалар кызарып чыккач, бөтен массаны майланган табага күчерегез. Өстенә йомырка сытып, кыздырып алыгыз һәм тәмле тәбә әзер.

Алма рулеты

600 г алма,

1 стакан шикәр комы,

1 стакан он,

100 грамм эремчек,

100 грамм үсемлек мае,

1 йомырка, тәменә карап тоз.

Алмаларның кабыгын чистартып, үзәген алыгыз, юка гына итеп турагыз. Эремчекне үсемлек мае белән кушып туглагыз, тоз һәм он өстәп тагын, бер кат яхшылап болгатыгыз. Килеп чыккан массаны икегә бүлеп 3 сәгатькә суыткычка куегыз. Аннары ике корж ясап, өстенә алмаларны җәеп, шикәр комы сибегез. Рулет итеп төрегез һәм өстенә йомырка сөртеп духовкада пешереп алыгыз.

Ә сез алмадан нинди үзенчәлекле, гади, җиңел һәм тәмле ризыклар әзерли беләсез?

Фото: pixabaу